|
  
Kalaallit Nunaanni qarasaasiaq atorlugu nakorsiartitsisinnaanerup piorsaaviginerata pilertornerusumik ineriartortinnissaa peqqinnissaqarfiup qangali kissaatigisimavaa.
Inatsisartut 2007-p ukiaanerani ataatsimiinnerminni aningaasaliissutinut ilassutitut 25,6 miliuuni koruunit suliniutip 2008-miit 2010-p tungaanut piviusunngortinnissaanut aningaasaliissutigaat. Suliniut januaarip 1-ani 2008 aallartinneqartoq decembarip 31-ani 2010 naammassineqassaaq.
Suliniuteqarnermut piffissaliussap iluani qarasaasiaq atorlugu nakorsiartitsinissamut attaveqatigiissinnaanermullu Kalaallit Nunaanni qarasaasiakkut nakorsiartitsinermi nuna tamakkerlugu sunniuteqarluartunik atorluarneqartunillu atortorissaarutinik pissarsinissaq naalakkersuisut suliakkiissutigaat.
Suliniut peqqinnissaqarfiup anguniakkatut siunniussaanut ” najugaqarfimmi peqqissuunissaq” kiisalu ”Kalaallit Nunaanni innuttaasut tamarmik peqqisuunissaannut” piviusunngortitseqataassaaq.
Peqqinnissaqarfimmi qarasaasiaq atorlugu sullissinerup ineriartortinnisaanut siunniussanut teknikki nutaaq (digital) atorlugu peqqissuseq 2008-miit 2012-imut, ” teknikkip nutaap peqqinnissaqarfimmi tamakkiisumik atugaalernissaanut,- innuttaasut peqqinnerulernissaannut, pinaveersaartitsinermut nappaatinillu nakorsaanermut” suliniut pingaarutilittut inisisimavoq.
Suliniuteqarnermi anguniagaavoq qarasaasiaq atorlugu nakorsiartitsinermut atatillugu sullissinerup sumiiffinnut 50-it sinnerlugit inulinnut tamanut siammarneqarnissaa, taamaasilluni 2010-mi nuna tamakkerlugu innuttaasunik qarasaasiakkut nakorsiartitsisoqarsinnaalissaaq.
Atortorissaarutinik assigiiaanik ikkussuisoqassaaq sumiiffiit tamarmik assigiinnik atortorissaaruteqalersillugit. Atortut patajaatsuullutillu aserujaatsuussapput atuisussaasusilu pitsaasumik sullinneqarnissarsi atorluaanissarlu qulakkeerniarlugit, atortut pisariitsumik atorneqarsinnaasuussapput. Ilaatigut nunaqarfinni misissuisinnaanerup annertusaaviginissaa kissaatit ilagisimavaattaaq.
Qarasaasiaq atorlugu nakorsiartitsisinnaalernermi innuttaasunut tamanut peqqinnissaqarfimmit sullinneqarnissamut periarfissat pitsaanerulissapput, innuttaasullu kissaatigisaat naapertorlugu nappaatit nalinginnaasut pisariitsullu sumiiffinni pitsaasumik nakorsarneqarsinnaalissapput.
Pisariaqarpat peqqinnissaqarfiup immikkut ilisimasalinnit nakorsagassat aamma neqerooruteqarfigisinnaalissavaai. Nakorsartittussanik innersuussisarnerup pitsaanerulerneranik, misissortinnerit ikilinerannik, sukkanerusumik nappaatit suussusersisinnaalernerannik, nakorsartinnissamut utaqqisarnerup sivikillineranik napparsimasullu angallannerisa annikillinerisigut, qarasaasiaq atorlugu nakorsiartitsisinnaalerneq atuilluarnerulersitsisinnaavoq.
Taamaasilluni qarasaasiaq atorlugu nakorsiartitsisinnaalerneq peqqinnissaqarfiup suliassaanut pisussaaffiinullu innutaasunut ataasiakkaanut iluaqutaasussamik annertuumik sunniuteqartussaavoq.
Dagens Medicin - 7. november 2008:
http://www.dagensmedicin.dk/nyheder/2008/11/07/grnlands-sundhedsvsen-far-/
Qanorooq 15. oktober 2008: Qarasaasiaq atorlugu nakorsiartitsisinnaalernissamik suliniuteqarneq:
Qanorooq 15. oktober
|