vælg et emne
... sammisaq toqqaruk

Pisussat > Tarnikkut nappaateqarneq pillugu ataatsimiinnissaq

 

Ulluni 22-23. marts 2017 tarnikkut nappaateqarneq pillugu ataatsimiinnissamut qaaqqusissut

Peqqissutsimut Naalakkersuisutut nuannaarutigeqaara tarnikkut nappaatit pillugit soqutiginnittut tamaasa ataatsimiinnissamut aggersarlugit qaaqqusinnaagakkit.  Tarnikkut nappaateqarneq pillugu ataatsimiinnermi tarnikkut nappaatit, tarnimikkut napparsimasut taakkununngalu ilaqutaasut  kiisalu susassaqarfiit akimorlugit suleqatigiinneq ukkatarineqassapput. 

Tarnikkut nappaatit pillugit ataatsimiinneq tarnimikkut nappaatilinnik toqqaannartumik toqqaannanngikkaluamilluunniit sullissisunut imaluunniit tarnimikkut nappaatilinnut ilaqutaasunut peqataaffigineqartussanngorlugu  ingerlanneqassaaq. Taamaattumik kommunini pitsaaliuinermut siunnersortit, tapersersortit, sulianik sullississut, immikkoortortani pisortat, kommunimi politikerit, tarnimikkut nappaateqartunut sulisutut atorfillit allallu peqataarusullutik soqutiginnittut ataatsimiinnissamut  qaaqqorusuppakka.

Tarnikkut nappaatit pillugit ataatsimiinnermi nunatsinni sianissutsikkut peqqissuseq pillugu tamakkiisumik isiginnilluni saqqummiunneqassaaq. 
Tarnikkut nappaatit pillugit ataatsimiinneq suleqatigiikkuutaarluni suliaqarnissamut inissaqartitsiumaarpoq taamaalillutik peqataasut unammilligassat, ajornartorsiutit aaqqiissutaasinnaasullu oqallisigisinnaassammatigit.  Ataatsimiinnissamut pilersaarut piareerpat kingusinnerusukkut  pisortatigoortumik nalunaarutigineqarumaarpoq. 

Ataatsimiinnissaq pillugu paasissutissat:
Tarnikkut nappaatit pillugit ataatsimiinneq ingerlanneqassaaq Nuummi Hotel Hans Egede-mi ulluni 22. marts nal. 13-17 aamma  23. marts nal. 9-17.
Ataatsimiinnermi soqutiginnittunut tamanut akeqanngitsumik peqataaffigineqarsinnaavoq
Kommunini tapersersortit sinerissamilu tarnimikkut nappaatilinnut sullissisut angalanermut ineqarnermullu akiliunneqarumaarput. Peqataaniartut allat angalanissaq ineqarnissarlu nammineerlutik akilissavaat. 


Aningaasartuutit allat, matumani ataatsimeersuarnermut atatillugu ullormusiat sulisitsisumit akilerneqassapput. Kingusinnerpaamik nalunaarfissaq: 1. marts 2017

 

Inussiarnersumik inuulluaqqusillunga

 

Agathe Fontain

 

Nalunaarneq immersugassaq immersorneratigut pissaaq taannalu uani nassaarineqarsinnaavoq

 

Assi: Ulrik Bang