Ullut tamaasa eqqarsaatitit misigissutsitillu allattakkit imal. toqusoq allaffigiuk. Taamaasillutit kingumut qiviarlutit allassimasatit atuarlugit nikeriarsimanerit aallaqqaataanisuullu oqimaatsigijuaannannginnera takusinnaalissavat.
Toqusoqarnera pillugu ilinniagalimmik piffissami sivisujaami oqaloqateqarnissat isumagiuk inuunermullu ajunngitsumut ingerlariaqqissinnaaqqulutit eqqarsaatitit misigissutsitillu suliarikkit.
Toqusup toquffia sungiunniarlugu nalinginnaasutut ersigisassaanngitsutullu isigilesinnaaqqullugu ornittaruk. Taamaaliornikkut eqqarsaatitit oqinnerulissapput.
Saaffigisat: Imminut toquttoqarnerani qimataasut – Nunarput tamakkerlugu
Imminut toquttoqarsimatillugu qanoq pisoqartarnera naatsumik oqaatigalugu
Imminut toquttoqarsimanerup kingorna nalinginnaasumik ima pisoqartarpoq:
a) Toqusoqarnerata paasineqarnera
b) Politiit attavigineqarnerat portørinillu aggersaaneq
c) Timip toqungasup eqqaata politiinit assersorneqarnera
d) Portørit toqusumik napparsimmavimmukaassinerat
e) Nakorsap toqusimanermik nalunaarusiornera oqaluffiullu allaffianut toqusoqarneranik nalunaaruteqarnera
f) Qimataasut ilaquttanik allanik kaleriinerat
g) Qimataasut oqaluffiup allaffianut attaveqarnerat
h) Oqaluffiup allaffianit toqusup suminngaanniit qassinullu anninneqarnissaa ilisaanissaalu pillugit radiokkut allagarsiinikkullu nalunaaruteqarneq
i) Toqusut inaanni naggammik najuunneq
j) Oqaluffimmi ilisineq
k) Iliveqarfimmut angallassineq
l) Iliveqarfimmi ilisineq
m) Ilisineq naammassippat qimataasunut ilaqutaasunullu kaffillerneq
n) Qimataasut ilaqutaasullu aviisitigut aamma/ imal TV-kkut qujaniuteqarnerat
Naapikkumaakkatit najukkamilu ikiorsiisinnaasut
Imminut toquttoqarnerata kingorna pisortaqarfiit attavigiumaagassatit ukuupput: Immikkoortut toorlugit paasisassarsiorit:
Politiit
Toqusoqarnerani politiinut sianernermi, politiit napparsimmavimmut attaveqassapput tassanngaanniillu portørimik/nik aggersaanissaq isumagineqassaaq.
Toqusoqartillugu pinerluttoqarsimasinnaaneranik paasiniaanissaq politiit suliassaraat. Politiit naliliinerat naapertorlugu pisariaqartinneqarpat politiit kommunimi inunnik isumaginnittoqarfik attavigissavaat.
Inuulluaqqussutitut allakkat qimataasunut atuartinneqassapput. Allakkat suliap naammassineqarnissaata tungaanut politiinit tigummineqassapput.
Politiit pisoqarfik assilissavaat, assit killiligaanngitsumik toqortarineqassapput. Imminut toqunnermi atorneqarsimasut politiinit - sivisunngitsumilli toqqortarineqartarputaaq.
Politiit attavigikkit
Attavik una atorlugu najukkanni politiini attavissannut paasissutissat pissarsiarikkit
Napparsimmavik
Pinasuartumik attaveqarniaraanni ambulancimut sianertoqarsinnaavoq. Najukkanni pinasuartumik saaffissat normui uani takukkit.
Sukkulluunniit najukkanni peqqissaavimmut saaffiginnissinnaavutit:
Nakorsamut sianeruit qanoq innerit oqaatigiuk
Nakorsiarnermi anigoruminaatsumik nalaataqarsimanngitsumik ilaqarnissaq isumatusaarneruvoq.
Najukkanni peqqinnissaqarfiup normua uani pissarsiarisinnaavat
Portørit suliassaat:
Portørit aggersarneqarunik toqusimasorisamut pinasuartumik orniguttarput
Toqusoq portørit napparsimmavimmut angallatissavaat
Nakorsap napparsimmavimmi takusaasup toqusimaneq uppernarsassavaa.
Nakorsap toqusunut uppernarsaat immersoriarlugu oqaluffiup allaffianut nassiutissavaa
Portørit toqusup toqusut inaannukaannissaanut piareersartarpaat
Toqusoq amerlanertigut sap. akunnera toqusut inaaniitinneqartarpoq
Ilaqutaasut toqusumik naggammik takusaanissaat portørit isumagissavaat
Toqusoq ulloq ilisaaffissaq toqusut inaanni tussiunneqareerpat illerfia portørinit oqaluffiliaanneqassaaq
Kommuni
Innuttaasoq kinaluunniit ikiuutaasinnaasunik nassaarniarnermi ikiuuttussamik kommunimi sullissisoqarnissamut pisinnaatitaaffeqarpoq.
Kommunimi inunnik isumaginninnermi sukkulluunniit attavigineqarsinnaasumik pigaartoqartarpoq. Politiit aqqutigalugit inunnik isumaginninnermi pigaartuusoq attavigiuk.
Innuttaasunik sullissivimmut saaffiginnissinnaavutit tassanngalu sullissisussannut qanoq ikiorneqarsinnaaninnik naliliisinnaasumut innersuunneqarlutit.
Ass. tarnip pissusaanik immikkut ilisimasalimmut innersuunneqarsinnaavutit.
Ass. ilaqutariinnik sullissivimmut ikiuullutillu siunnersuisinnaasunut aamma innersuunneqarsinnaavutit. Ilaqutariinnut sullissivimmi ass. imminut ilisaritinnani akeqanngitsumik ammasumik siunnersuisarfeqarpoq. Ass. nerisassanut ineqarnermullu tunngasunut aningaasatigut ikiorneqarsinnaavutit.
Toqusup pigisaanit akilerneqarsinnaanngitsunut- ilisinermi aningaasartuutinut naammaannartunut akiliunneqarsinnaavutit. Aningaasaruutit naammaannartut tassaassapput ilisinermut akikinnermut akiliunneqarneq. Ilisinermut namminermut tunngasunut – illerfimmut, ilivissamut, naasunut assigisaannullu tapiisoqarsinnaavoq.
Immikkut meeqqanut inuusuttunullu 18-it inorlugit ukiulinnut ilaatigut makku neqeroorutaasinnaapput:
Nammineq inuttut siunnersorti imal. tapersersorti oqaloqatiginnittarnikkut meeqqamut ilaqutariinnullu ikiuuttussaq
Angerlarsimaffimmut orniguttartoq ilaqutariit ulluinnarni aaqissuussamik inuuneqarnissamut, meeqqanik killiliinissamut toqqammavissiinissamullu ikiuuttussaq ilaqutariillu atuarfimmut, ulluunerani paaqqinnittarfimmut imal. meeraaqqerisumut attaveqarnerannut ikiuuttussaq.
Illit kommunerisanni attavigisinnaasatit uani takukkit:
Avannaata Kommunia
Kommune Qeqertalik
Qeqqata Kommunia
Kommuneqarfik Sermersooq
Kommune Kujalleq
Kommunerisanni perorsaasutut tarnillu pissusaanik ilisimasalittut siunnersuisartoq (PPR) aamma attavigisinnaavat. PPR meeqqanut ukioqanngitsuniit 18-inik ukiulinnut sullissisuuvoq. PPR-imi siunnersuisartut meeqqat alianartumik anigoruminaatsumillu nalaataqartut ilisimasaqarfigaat, angajoqqaanullu siunnersuineq ilitsersuinerlu- kiisalu meeqqanut inuusuttunullu pisoqareernerani
( pisoqarnerata kingorna nal. ak. 72 –it qaangiunneranni) marloriarluni pingasoriarluniluunniit anigoruminaatsumik atugaqarnermi ikiorsiissutitut oqaloqatigineqarneq neqeroorutigisinnaallugu.
Siunnersuisarfik MISI, Kommuneqarfik Sermersooq, Oqarasuaat: 366 330.
MISI Qeqertalik, Kommune Qeqertalik, Tlf. 70 19 00
MISI Avannaa, Avannaata Kommunia, Tlf. 70 18 00
MISI, Kommune Kujalleq, Oqarasuaat: 705430
PPR, Qeqqata Kommunia, Oqarasuaat: 865 540
Oqaluffik
Innuttaasoq kinaluunniit upperisaq apeqqutaatinnagu iliveqarfimmi ilisaanissamut pisinnaatitaaffeqarpoq. Oqaluffimmit makku isumagineqarsinnaapput:
Ilisinermi peqataasunik bussimik angallassineq
Bussit unittarfianni allagarsiinikkut radiokkullu ilisinissamik nalunaaruteqarneq
Oqaluffimmiit iliveqarfimmut illerfiup angallanneqarnissaa
Iliveqarfimmi assaasussat
Pisariaqarpat apummik nivattussat
Najukkanni oqaluffiup allaffianut oqarasuaatip normua uani pissarsiariuk
Oqaluffimmit isumagineqartussat:
Toqusup upperisaa apeqqutaatinnagu nakorsap toqusumut uppernarsaasiaa oqaluffimmit tiguneqassaaq.
Toqusoqarneranik nalunaarut oqaluffimmit immersorneqassaaq pisortanullu toqusoqarnera nalunaarutigineqassalluni.
Toqusup oqaluffimmit ilisaanissi kissaatigisimappagu, qimataasut toqusup kuisinnermut allagartaa, atserneqarnermut uppernarsaataa imal. katinnermut allagartaa nassarlugit oqaluffimmut saaffiginnissapput. Toqusoq upperisarsiortunut allanut ilaappat, ilisinissap aaqqissuunnissaa pillugu upperisarsiortut pineqartut saaffigissavatit. Toqusoq ilagiinnut ilaanngippat ilaqutariilli oqaluffimmit ilisaanissaa kissaatigippassuk, palasip ajoqilluunniit toqusut inaanniit oqaluffimmiilluunnniit sivikitsumik naalagiussinnaavaat. Ilivissarsineq akeqanngila.
Qimataasut oqaluffik peqatigalugu isumaqatigiissutigissavaat:
Toqusut inaanniit qaqugu annissinissaq
Toqusut inaanni tussiutit suut atorneqassasut
Illerfissamik inniminniineq. Toqusoq illerfissarsiutileqatigiinnut ilaasortaappat peqatigiiffik attavigineqassaaq, ilaasortaanngippat oqaluffiup allaffianit napparsimmaviup peqqumaasivianit illerfissaa inniminnerneqassaaq.
Toqusoq anninneqareerpat qimataasut makku isumaqatigiissutaanissaat siunertaralugu oqaluffimmut saaffiginneqquneqarput:
Ulloq suna nalunaaqutarlu qassinut ilisisoqarnissaa
Tussiutit suut atorneqarnissaat
Palasi oqaluffimmi ilisinermut atugassamik oqaluusissiorsinnaaqqullugu toqusoq qimataasullu pillugit paasissutissiineq
Erinarsoqatigiit kikkut oqaluffimmi tussiassanersut (ugeavisi aamma takuuk)
Ass. sila ajussappat qanoq iliortoqarnissaa
Ullormi ilisiffissami illerfik toqusut inaanniit oqaluffiliaanneqassaaq
Oqaluffimmi ilisineq
Sanningasoq, illerfik naasullu biilimut illerfimmik angallassisussamut ingerlanneqassapput
Iliveqarfimmut ingerlassineq
Iliveqarfimmi ilisineq
Palaseqarfik
Tarnikkut erloqissuteqarnermi palasimik oqaloqateqarnissaq palaseqarfimmit neqeroorutaasinnaavoq.
Oqaloqatigiinneq nalinginnaasumik nal. ak. ataatsip iluani ingerlanneqartarpoq.
Pisariaqartitsineq naapertorlugu arlaleriarluni oqaloqatigiinnissaq isumaqatigiissutaasinnaavoq.
Najukkanni palaseqarfiup oqarasuaataata normua uani naniuk
Illerfissarsiutileqatigiit
Toqusoq illerfissarsiutileqatigiinnut ilaasortaasimappat, peqatigiiffik saaffigissavat. Peqatigiiffimmut ilaasortaq toqukkut qimaguppat illerfissarsiutileqatigiit illerfissaa akilissavaat. Illerfik, sanningasoq, naasumernit oqaluffimmiillu iliveqarfimmut ingerlanneqarnera qimataasut peqatigiiffimmit pissarsiarissavaat.
Kikkulluunniit ukioqanngitsuniit 17-inut ukiullit ukiumut 100 koruuneerlutik 18-iniillu ukiullit ukiumut 200 koruuneerlutik akiliuteqartarnikkut peqatigiiffimmut ilaasortanngorsinnaapput. Pisariaqarpat ilaasortaaneq akiliutaasartorlu pillugit peqatigiiffik attavigisinnaavat. Ilaasortaanermut akiliut allaffimmut saaffiginninnikkut aningaaserivimmiluunniit konto-mut nakkartitsinikkut akilerneqarsinnaavoq.
Atuarfiit
Atuarfiit aqqutigalugit inuusuttunut toqukkut qimataasunut immikkut neqerooruteqarpoq:
Ilinniartitsisumik oqaloqateqarsinnaavutit
Atuarfiit ilaat inunnik isumaginninnermi siunnersortimik atorfeqartitsipput. Atuarfiup allaffianut saaffiginninnikkut inunnik isumaginninnermi siunnersortimut innersuunneqarsinnaavutit.
Tassani atuartut inunnik isumaginninnermi siunnersortimik sivikitsumik oqaloqateqartarnissat periarfissaraat, angajoqqaataaq ilinniartitsisorlu isumaqatigiissusiornikkut atuarfimmi inunnik isumaginninnermi siunnersorti isumasiorlugulu siunnersuisissinnaavaat. Atuarfiup allaffia immersugassamik peqarpoq. Immersugassami ajornartorsiutit inunnik isumaginninnermi siunnersortimik oqaloqateqarusunnermut patsisaasut naatsumik oqaatigineqassapput. Illit nammineq inunnik isumaginninnermut siunnersortimut saaffiginnillutit taanna peqatigalugu immersugassaq immersorsinnaavat.
Ilinniaqqinnerit akunnattumik sivisussusillit qaffasinnerusumillu angusaqarniarluni ilinniaqqinnerit
Ilinniarneq pillugu siunnersuisoq oqaluussinnaavat
Illoqarfiit ilaanni ilinniartunik siunnersuisartumut innersuussisoqartarpoq
Tarnip pissusaanik immikkut ilinniagalimmik kisimiilluni ataatsimoorlunilu oqaloqateqarneq.
Inuunerissutsinnut sunniuteqartumik ilinniakkannullu akornutaasumik tarnikkut ajornartorsiuteqarnermi akornusersuisunilluunniit eqqarsaateqarnermi neqeroorut
Ilinniarfiit aqqutigalugu ilinniartunik siunnersuisartumut innersuunneqarsinnaavutit
Atuarfiup allaffianut saaffiginnigit oqaloqateqarnissarlu noqqaassutigalugu.
Eqqartuussivik
Toqusumut uppernarsaatip palasimit tunniunneqarneragut nunap immikkoortuani eqqartuussivik toqusoqarneranik ilisimatinneqassaaq. Nunap immikkoortuani eqqartuussiviup toqusup pigisaasa agguaanneqarnissaat isumagissavaa.
Nunap immikkoortuani eqqartuussivik kommunimut, aningaaserivimmut, INI A/S-imut, Nukissiorfinnut Tele-mullu - toqusoq aningaasanik pissarsiassaqarnersoq paasiniarlugu allagaqassaaq. Nunap immikkoortuani eqqartuussivik illerfissarsiutileqatigiinnut kingornussassialianillu nalunaarsuiffimmut aamma allagaqassaaq.
Nunap immikkoortuani eqqartuussiviup toqusup pigisarisimasai kikkullu toqusumut ilaqutaanersut paasiniarlugit toqusup ilaqutai attavigissavai. Qimataasut namminneq aamma nunap immikkoortuani eqqartuussivimmut saaffiginnissinnaapput.
Toqusup ilaqutaasa toqusup pigisai nalinginnaasut nalillillu pillugit paasissutissat immersugassamut allattussavaat nunallu immikkoortuani eqqartuussivimmut tunniullugit.
Kingornussisussat arlaqarpata nunap immikkoortuani eqqartuussivik peqatigalugu ataaseq toqusup pigisaanik isumaginnittussatut toqarneqarsinnaavoq. Taamaattoqassappat pisinnaatitsissut atsiorneqassaaq. Tamatumunnga atatillugu toqusup akiitsoriumaagaasa isumaginissaannut kingornussisussat pisussaaffeqarput. Akiitsorisinnaasat akilernissaannut pisussaaffmmik tigummisaqarumanngikkaanni, toqusup pigisaasa nunap immikkoortuani eqqartuussivimmit isumagisassanngortinneqarnissaat periarfissaavortaaq.
Nunap immikkoortuani eqqartuussivik ilaqutariinnik oqaloqateqareerpat, eqqartuussisup toqusup pigisaasa qanoq agguaanneqarsinnaanissaat isummerfigisinnaasarpaa. Tamatuma kingorna pigisanik agguaassineq immikkut ilisimatitsisoqarani naammassineqarsinnaappat paasitinneqassaatit. Suliaq imaaliallaannaq naammassineqarsinnaanngitsoq paasineqarpat, nunap immikkoortuani eqqartuussivimmut ataatsimiigiaqquneqassaatit. Toqusoqarneraniit qaammatit marluk missaasa qaangiunneranni suliap qanoq ingerlanneqarsinnaanera pillugu nunap immikkoortuani eqqartuussivimmit oqaaseqaateqartoqarsinnaasarpoq.
Ilaqutaasut namminneq ilisinissaq isumagissavaat aningaasartuutillu akilerallassallugit. Toqusup qimataanit akissaqartinneqarpat aningaasat akiliutaasimasut taarserneqassapput. Ilaqquttat arlaannaalluunniit ilisinermut aningaasartuutinik akiliisinnaanngippat kommuni ikiuussinnaavoq.
Najukkanni nunap immikkoortuani eqqartuussivimmi attaveqarfissat uani pissarsiarikkit
Qimataasunut ilaqutaasunullu tunngatillugu inatsisit pillugit siunnersuutissat pitsaasut:
Toqusup pigisai paarilluakkit.
Toqusup aningaaserivimmit aningaasanik tigusinissamut allagartaa imal. illumut, biilimut angallammulluunniit matuersaatai ingerlaannaq nunap immikkoortuani eqqartuussivimmut tunniunneqassapput.
Toqusoq aningaasanik tigummisaqarsimappat toqusup qimataanut tunngatiillugu kontomut ikineqassapput. Ikisinermut uppernarsaat korti ilanngullugu nunap immikkoortuani eqqartuussivimmut tunniunneqassapput. Toqusup qimataanut kontomik suli pilersitsisoqarsimanngippat nunap immikkoortuani eqqartuussivik attavigineqassaaq.
Toqusup kontoaniit tigusisinnaanngilatit – taamaasioruit aningaasat utertinneqarnissaannik piumaffigineqarsinnaavutit.
Suliaq naammassitinnagu toqusup akiligassaanik akileeqinak.
Pigisat nalillit – tuniniarneqarsinnaasut nalunaarsorsinnaavatit.
Inatsisinut tunngasunik siunnersorneqarneq
Inatsisinut tunngatillugu ajornartorsiuteqaruit apeqqutissaqaruilluunniit inatsisinut tunngatillugu nalinginnaasumik ikiorserneqarnissaq noqqaassutigisinnaavat imal. annertusisamik inatsisinut tunngatillugu ikiorserneqarsinnaavutit. Inatsisinut tunngatillugu ikiorserneqarneq tassaavoq inatsisinut tunngatillugu akeqanngitsumik siunnersorneqarneq:
Inatsisitigut ikiorsiisarfimmit imminut ingerlatittumit Ikiu-mit,
Eqqartuussissuserisumit nammineq toqqakkamit,
Eqqartuussissuserisut nalunaarsuiffianneersumit
Imminut ikiorsersinnaanermut periarfissat siunnersuutillu pitsaasut
Tassani pisortaqarfiit imminut ikiorniarlutit attavigisinnaasatit allassimapput.
Alianartumik nalaataqarsimasut ikorfartoqatigiiffii
Kommunimi pinaveersaartitsinermi siunnersorti aperiuk
Ugeavisi takuuk
Oqarasuaatikkut siunnersorneqarneq
TUSAANNGA – TLF. 801180, SMS 1899
Tusaannga ullut tamaasa nal. 16.00-imiit 22-00 tungaanut ammasarpoq, attaveqarnerlu akeqarani kinaassutsimik isertuussisuulluni. Meeqqat, inuusuttut, inersimasullu tamarmik oqaloqateqarnissamik, allaqateqarnissamilluunniit pisariaqartitsisut Tusaannga attavigisinnaavaat.
Atuakkat, dvd-it, nittartakkat, quppersakkat il.il.
Imminut toquttoqartarnera pillugu sammisaq uani takuuk
Periarfissat allat
IKIU (324548) inatsisitigut ikiorsiisarfiuvoq; inatsisinut tunngatillugu apeqqutissaqaruit kinaassuseq isertuullugu akeqanngitsumik siunnersuisinnaasoq ilitsersuisinnaasorlu.
Mælkebøtten (314114) meeqqanut inuusuttunullu tamanut ornittagaasoq inersimasumik oqaloqateqarnissaq pisariaqartikkukku ikiuussinnaasoq.
Neriuffik – Kalaallit Nunaanni kræfti akiorniarlugu suliniaqatigiiffik (490489) soorlu toqusoqarneranut atatillugu misigissutsinik iliuuseqarfiginninnissaq pillugu pitsaasunik siunnersuutissalik.
Kalaallit Røde Korsiat (321800) inuttut anigoruminaatsumik atugaqarnermi tarnikkut ikiueqqaarnermi- soorlu inuttut anigoruminaatsumik atugaqarnermi pitsaasunik siunnersuutissalik.
SIK – Sulinermik Inuussutissarsiutillit Kattuffiata (321740) qanigisamik toqusoqarpat ass. suliassanut tunngasunik ikiorlutillu siunnersorsinnaavaatit.