vælg et emne
... sammisaq toqqaruk

Imigassaq - naliginnaasumik innersuussutit

PAASISSUTISSAT

Imigassaq Ikiaroornartullu pillugit Siunnersuisoqatigiit kaammattuutaat:

1.Inuusuttut 18-it inorlugit ukiullit imigassaq ingalassimalluinnartariaqarpaat

2.Piffimmi ataatsimi najoqqagassat amerlanerpaat sisamat

3.Naartunerup siorna nalaanilu kiisalu milutsitsinermi imigassartornaveersaarit

Ingasaassinngitsumik imertoqarpat allat ilagalugit imigassartorneq nuannersinnaavoq. Imigassartornerli aarlerinartortaqarpoq. Imigassat pinngitsuuisinnaajunnaarsitsisinnaavoq timikkut, isumakkut inooqataaniarnikkut arlalitsigut ajoqusiisinnaasoq.

Imigassartornerujartortillutit pinngitsuuisinnaajunnaarnissat nappaateqalernissallu ilimanarnerlissaaq.

Imigassaq nappaatinut qanorluissutsinut 60-init amerlanerusunut, assersuutigalugu kræftimut, tingullunnermut uummallunnermullu, attuumassuteqarpoq. Tamanna atuuppoq piffissami killilimmi annertoorujus-suarmik imigassartoruit (engukkuit) aamma piffissami sivisunerusumi annertuumik imigassartoruit.

Imigassamik pinngitsuuisinnaannginneq peqqissutsikkut kingunerlutsitsinerup saniatigut aamma inooqa-taaniarnikkut kingunerlutsitsisinnaavoq. Aappariinnerlutsitsilersinnaavoq, sulisarninnut sunniuteqarsinnaavoq, meeqqanik sumiginnaasitsisinnaavoq, nakuusertitsisinnaavoq naggataatigullu ajunaarnermik, pinerlunnermik toqutsinermilluunniit kinguneqartitsisinnaalluni.

Imigassamik atuinivit appartinnissaanut unitsinnissaanulluunniit peqqissutsikkut iluaqutissartaqarpoq. Katsorsarneqarsinnaanngitsumik nappaateqarnermi isumatsaqqanermilu imigassamik atuinerup annikillisinnera unitsinneraluunniit sukkanerusumik peqqissinissamut attuumassuteqartarpoq.

 


Innersuussutit

Imigassaq Ikiaroornartullu pillugit Siunnersuisoqatigiit najoqqagassatut killissarititaasutut kaammattuuti-gaat;

•Arnanut, sap.ak. najoqqagassat arfineq-marluk

•Angutinut, sap.ak. najoqqagassat 14-it

•Piffimmi ataatsimi najoqqagassat amerlanerpaat sisamat

Najoqqagassaq ataaseq tassaavoq immiaaraq viinnisorfilluunniit ataaseq.

Imigassartorneq tamatigut arlaatigut peqqissutsinnik innarliisinnaavoq, kisianni imigassamik atuinermik peqquteqartumik napparsimalernissat ilimanannginnerussaaq kaammattuutit uku najoqqutarisarukkit.

 


NEQEROORUT

Inuit ilaasa ajoqutaasumik imigassamik atuisarunnaarnissartik sapernartissinnaasarpaat. Imertarunnaarnissaq sapernartikkukku pingaaruteqarpoq sapinngisamik piaarnerpaamik sullissisunnut saaffiginninnissat imaluunniit Allorfimmut, pinngitsuuisinnaannginninnik katsorsaasinnaasumut, attaveqarnissat.

Kalaallit Nunaanni najugaqartut tamarmik akeqanngitsumik pinngitsuuisinnaannginnermut katsorsarneqar-sinnaapput.

Allorfik ugguuna attavigisinnaavat 52 53 43, piffissami 09:00-imiit 15:00-imut, imaluunniit mailikkut allorfik@allorfik.gl.

Illoqarfinni Allorfilinni (Qaqortumi, Nuummi, Sisimiuni, Aasiaanni aamma Ilulissani) ornigullutit saaffiginnissinnaavutit nal. 9-15.

Ullumikkut innuttaasut 18-it sinnerlugit ukiullit kisimik katsorsarneqarsinnaapput. Allorfinnili innuttaasunut 18-it inorlugit ukiulinnut killilimmik neqerooruteqarpoq.

Allorfiup nittartagaani paasisaqarnerusinnaavutit uani  www.allorfik.gl

 

 

NAMMINEQ QANOQ ILIUUSEQARSINNAAVUNGA

Imigassamik atuisarnivit appartinnissaa unitsilluinnarnissaaluunniit sapernarsinnaavoq. Inuup ataasiinnaap maanna taamaaliortoqassanersoq aalajangersinnaavaa, inullu taanna tassaavoq illit.
Annikinnerusumik imertalerniarlutit aalajangeruit ilorraap tungaanut alloriassaatit. Ileqqumik, immaqa inuuninni initoorujussuarmik, allanngortitsinissap sapernarsinnaanera piareersimaffigisariaqarpat. Qanorluunniit artorsartigissagaluarluit eqqaamajuartariaqarpat ileqqut allanngortinneqarsinnaammata, aamma upperisariaqarpat allannguisinnaallutit.

Imerpallaarunnaarnissamut imigassartunngilluinnarnissamulluunniit periutsit assigiinngitsuupput. Periuseq ilinnut naleqqunnerpaaq nassaarisariaqarpat.

Assersuutigalugu: 
•ulluinnarni imigassamik imertarunnaarsinnaavutit
•imikkatit akunnilersinnaavatit sodavandimik, juicemik allamilluunniit
•allat ilittulli atugallit attaviginiarsinnaavatit
•imigassaq eqqarsaatigiunnaarumallugu arlaannik sammisaqarsinnaavutit 
•ilaquttannit ikiorneqarsinnaavutit
•sullissisumik oqaloqateqarsinnaavutit

Nuannersut siunissarlu eqqarsaatiginerisigut imigassamik atuisarnivit iliuuseqarfiginissaanut aalajangiusi-manninnerit ajornannginnerulissaaq. 
Taava piviusorsiortumik anguniagaqarnissat tullernguuppoq. Ullormiit ullormut tupinnartuliortoqarnissaa naatsorsuutigisinnaanngilat. Ileqqup iperarnaviikkap allanngortinnissaata sivisusinnaanera piareersimaffigisariaqarpat. Ullormiit ullormut imigassartortarunnaarsinnaannginnerit arriitsumillu imigassamik atuinivit appariartortussaanera akueriuk. Nakkartooruit iluatsissinnaanngitsutut imminut eqqartuuteqinak. Aqaguani aallaqqaataaniit aallartigit anguniakkallu isiginiarlugu.
Annikinnerusumik imertalernissat illit nammineq aalajangissavat, ulluinnarnili ilinnik tapersersuisinnaasunik ikiorteqarnissat iluaqutigisinnaavat. Ajornartorsiutit tamannalu pillugu iliuuseqarniarnerit unneqqarillutit eqqartortarukku ilimanarnerussaaq ilaquttavit, ikinngutivit suleqativillu ikiussagaatsit.
Annikitsut, soorlu imerusulernermi ikinngutigilluakkamut sianerneq imaluunniit ilaquttavit imigassamik imernaveersaarnerat, iluaqutaasinnaapput. 

 

 

QANIGISAT

Pinngitsuuisinnaajunnaartoqartillugu ilaqutaasut meeqqallu naallioqataasarput, aamma ilaqutaasut amerlasuut qanoq iliornissartik pinngitsuuisinnaannginnerlu pissutigalugu ikit qanoq pitsaanerpaamik mamitinniassallugit nalornissutigisarpaat. 

Imigassamik pinngitsuuisinnaanngitsumut ilaqutaasut inersimasut ilaqutariinnik katsorsaanermut ilaasinnaapput. 

Ilaqutariinnik katsorsaaneq ilaqutaasuni inersimasunut tunnganeruvoq, siunissamili aamma meeqqanut tunngalertussaassaaq. 

Ilaqutariinnik katsorsaanermi amerlanertigut ilinniartitsisoqartarpoq, sungiusartoqartarpoq eqimattatullu suleqatigiittoqartarluni. Pinngitsuuisinnaannginneq suunersoq pinngitsuuisinnaannginnerlu ilaqutariinnut qanoq sunniuteqartartoq pillugu ilinniartitsisoqartarpoq. Ilinniartitsinermi peqataasut inummut pinngi-tsuuisinnaanngitsumut ilaqutaanermut atatillugu misigissutsit artornartut eqqartornissaanut suliarinissaannullu periarfissaqartarput.

Uani atuarnerugit: www.allorfik.gl


SAAFFIGINNINNISSAMUT PAASISSUTISSAT

Sullissiviup nittartagaani illit kommuninni sullissisorisat attavigiuk.

www.allorfik.gl

 


ILANNGUTASSIANUT ALLANUT INNERSUUSSUTIT


Max4Tassa
Sapaatip Akunnera 18
Imerpallaarnerlutit misilitsigit, una imigassaq pillugu misiliut iserfigiuk

 


NITTARTAKKAT ALLAT

Tupa imigassarlu, Naatsorsueqqissaartarfik 

www.alkohol.dk

 

 

PDF-iliariukEmbed

Allaaserisaq nittartakkannut iliguk (Embed)

"Imigassaq - naliginnaasumik innersuussutit". Allaaserisaq nittartakkannut script ataaniittoq kopiissuat taavalu inissisimaffissaanut nittartakkavit html´anut ikkullugu

Luk

Nassiuguk ikinngutinnut

Uunga e-mail

Atit

Nassiussaq

Luk

Kalerriut

Allataq

Email

Luk

Allaaserisaq pisartagarileruk

E-mailit

Luk