Ikkikkut aseruuttoorneq
NAPPAAT SUMIIPPA?
Ikkiit' killiganni.
NAPPAAMMUT SUNA PISSUTAAVA?
Bakteeriat assigiinngitsorpassuit qanermiittuaannarput. Taakku kigutinut pisarput, pingaartumik ikkiit killigannut kigutillu akornannut. Uumassusillit allat assigalugit bakteeriat igitassaminnik piiaasarput. Bakteeriat ullut tamaasa peerneqanngikkaagamik igitassaataat ikkini aseruuttoornermik kinguneqartitsisarput.
NAPPAAT QANOQ MALUGISSAVIUK?
Ikkikkut aseruuttoorneq nalinginnaasumik toqqaannartumik malugissanngilat. Akerlianilli takusinnaavat, tassami ikkitit pullalerlutillu taartumik aappilleqqassapput. Ilaannikkooriarlutit ajortoqarnera naamasinnaassavat, tassami kigutit ipertuut bakteeriarpassuallillu tipittaqimmata. Ikkiit aseruunnertallit aanaaqqajaasarput. Ikkinnit aanaaleruit, assersuutigalugu kigutigissarninni, qularnanngitsumik ikkikkut aseruuttoorneqalersimanerit pissutaassaaq.
NAPPAAT QANOQ KATSORSARNEQASSAVA?
Bakteeriat tamaasa peerlugit kigutit salinneqarpata, tamatumalu kingorna illit ullut tamaasa kigutigissarluartarnikkut kigutitit eqqiluitsuutilluinnarukkit, taava ullualunnguit ingerlaneranni ikkikkut aseruuttoorneq peerutissaaq. Saliineq siulleq kigutit nakorsaata kigutigissaasulluunniit isumagisariaqarpaa. Aseruuttoorneq sivisuallaamik atorsimagukku saaneq kigutivit manngussimaffigisaat aseroriaannaassaaq. Taamaalippat kiguserfilunnermik taaneqartartumik ajoquteqalersimassaatit. Kiguserfilunneq katsorsaruminaatsuuvoq, amerluusitugullu ima ajortigilertarpoq, allaat kigutaajartittariaqalerluni.
NAMMINEQ QANOQ ILIORSINNAAVIT?
Ikkikkut aseruuttoorneq kigutit putoqalernerattulli pisassaavoq: Ullut tamaasa, kigutigissarluartarnerup kigutit ikkiillu eqqiluitsuutitarpai - taamalu ikkikkut aseruuttoortoqassanngilaq.
Kigutigissarneq pillugu siunnersuutinik pitsaasunik kigutit nakorsaannit imaluunniit kigutigissaasumit pisinnaavutit.