Paasissutissat
Atornerluinermut katsorsaasarnerup misissuinera januar 2016 aallaqqaataani allanngorpoq, tassani nuna tamakkerlugu pinngitsuuisinnaarnermut katsorsaasarnerup pilersaarutaa atuutilermat.
Pilersaarummi innuttaasut aanngajaarniutinik ajornartorsiuteqartut ikiorsernerqarnissaannut tunngasutigut kommunit, peqqinnissaqarfiup katsorsaasullu akornanni suleqatigiinnerup nukittorsarneqarnissaa kajumissaarutaavoq.
Neqeroorutit
Illoqarfinni ukunani Qaqortumi, Nuummi Sisimiuni, Aasianni, Ilulissanilu katsorsaaveqarpoq. Iilloqarfinni najukkani amerlasuuni katsorsartinnissamut neqerooruteqartoqartarluni Nuummilu Katsorsaavik suleqatigalugu aamma katsorsaasoqartarpoq kiisalu aningaasanoornermut tunngatillugu Odense-mi aningaasanoorajunnermut qitiusumik katsorsaavimmi katsorsartinnissamut neqerooruteqarluni.
Nammineq qanoq iliuuseqarsinnaavunga?
Katsorsartinniaruit:
• kommunimi sullissisunnut saaffiginnissaatit, allorfinniluunniit sullissisut saaffigalugit.
• Kommunimi sullissisut katsorsaasulluunniit innersuussinermi immersugassamik immersuissaaq taannalu Allorfimmut/pinngitsuuisinnaajunnaarneq pillugu Paasisimasaqarfimmut nassiullugu.
• Allorfimmit neqeroorummut ilinnut naleqquttumut innersuunneqassaatit.
• Katsorsartinnissamut pilersaarummik -kommunip, katsorsaasut pisariaqarpallu peqqinnissaqarfiup suleqatigiissuteqarsinnaanissaannut akuersissummik- kommunimi sullissisuit atsioqqussavaatit.
• Inuunermut aanngajaarniutinik atuiffiunngitsumut ikaarsaarneq oqinneroqqullugu kommunimi sullissisup illit suleqatigalutit katsorsartereerninni qanoq ikiorserneqarnissat pillugu pilersaarusiussaaq.
Sullissisunut
2016-imi januaarip aallaqqaataaniit innuttaasunik aanngajaarniutinik aningaasanoornermillu ajornartorsiutilinnik -kommunimut akeqanngitsumik- katsorsartittoqarsinnaanngorpoq.
Piumasaqaataavoq:
1. Sullitap katsorsartereernermini aanngajaarniutinik atuisuunnginnermik attassiinnarnissaanut inuttut pisariaqartinneqarsinnaasut tamatumunnga akornutaasut iliuuseqarfiginissaasa kommunimit piumassuseqarfigineqarnissaat. Katsorsartinnerup ilaatut tamanna qulaajaavigineqassaaq.
2. Katsorsartereernerup kingorna inuuneq aatsaat nalorninarsippat kommunip tigussaasumik pilersaaruteqarnissaa.
Pilersaarut taanna tunngaviusumik katsorsartinnissaq aallartitsinnagu piareersimassaaq.
3. Innersuussinermi immersugassamik immersuisimanissaq.
4. Kommunip Allorfiullu/Atornerluineq pillugu Paasisimasaqarfiup akornanni suleqatigiinnissamut isumaqatigiissummik atsiornissaq. Katsorsartereernerup kingorna ilaatigut inuttut atukkatigut peqqissutsimulluunniit tunngatillugu pisussanik suleqatigiissuteqarnissaq isumaqatigiissusiornikkut qulakkeerneqassaaq.
Sullissisutut:
• Sullitaq peqatigalugu innersuussinermut atatillugu immersugassat immersorneqassapput katsorsartereernerullu kingorna pilersaarusiortoqassalluni. Nittartagaq www.allorfik.gl takuuk. Kommuninni isissutissaq atorlugu innersuussisinnaassaatit.
• Allorfiup innuttaasoq innersuutissavaa katsorsaavillu attavigalugu.
Saaffiginniffissat
Nalornissuteqaruit Allorfimmut/Pinngitsuuisinnaajunnaarneq pillugu Paasisimasaqarfimmut attaveqarsinnaavutit:
E-mail: allorfik@allorfik.gl
Oqarasuaatikkut: 525343
Attavigigutsigut illit nammineq attavigineqarnissannut paasissutissat ilanngunnissaat eqqaamassavat.