vælg et emne
... sammisaq toqqaruk

Suliffeqarfiit peqqissut pillugit suleqatigiinneq

19-09-2017

Suliffeqarfimmi atugarissaarneq ilaatigut sulisut naammagisimaarluarnerannut napparsimakulannginnerannullu peqataaqataasarmat sulisut peqqissut nuannaartullu pitsaasumik nassataqarsinnaapput. Sulisut peqqissuunissaat atugarissaarnissaallu anguniarlugit suliffeqarfiit tapersersorneqarnissaannut CSR Greenland, Kalaallit Nunaanni Timersoqatigiit Kattuffiat aammalu Peqqissutsimut Naalakkersuisoqarfik maanna suleqatigiinnialerput.

CSR Greenlandimi siulittaasup tulliata, Martin Kviesgaardip, Kalaallit Nunaanni Timersoqatigiit Kattuffianni siulittaasup, Nuka Kleemannip aammalu Peqqissutsimut Naalakkersuisup, Agathe Fontainip suliniut ”Suliffeqarfiit peqqissut” pillugu suleqatigiinnissamik isumaqatigiissut ukiuni pingasuni atuuttussaq atsioqqammerpaat.

Suliniummi anguniarneqartoq pingaarneq tassaavoq innuttaasut peqqissuunerannik siuarsaanissaq. Suliniummi oqaatsit pingaarnerit tassaapput: peqqissuseq pillugu aallartitatut ilinniartitaaneq, peqqissuseq pillugu aaqqissuussaasumik aqutsineq aammalu suliffeqarfinni iliuusissanik peqqissutsimut attuumassuteqartunik atuutsitsilerneq.

Suliniummi aallaavigineqarpoq suliffeqarfiit arlallit sulisut atugarissaarnissaat pillugu aaqqissuussaasumik sulissuteqareernerat. Suliffeqarfinni peqqissutsimik atugarissaarnermillu ikorfartuiniarluni siuarsaaniarlunilu peqqissuseq pillugu aaqqissuussaasumik aqutsinerup sulissutiginissaanut sakkussanik aalajangersimasunik suliffeqarfinnut neqerooruteqarnissaq CSR Greenlandip, Kalaallit Nunaanni Timersoqatigiit Kattuffiata aammalu Peqqissutsimut Naalakkersuisoqarfiup kissaatigaat.

Suliniutip suliffeqarfinni annertuumik tapersersorneqarnera suliniummi illuatungeriinnit assut nuannaarutigineqarpoq. Peqqissuseq pillugu aallartitatut pikkorissartitsinerit peqataaffigineqarluarput aammalu peqqissuseq pillugu aallartitat siulliit 50-it suliffeqarfinnit assigiinngitsunit 20-neersut pikkorissarnerni Nuummi Sisimiunilu ingerlanneqartuni ilinniarnerminnik naammassinneqqammerput.

Peqqissuseq pillugu aallartitatut naammassinnittut suliffeqarfinni sammisassanik peqqinnartunik qanoq aallartitsinissaq ingerlatitsiinnarnissarlu pillugu ilisimasaqalerput. Tullinnguuttoq tassaalerpoq suliffeqarfinni peqataasuni peqqissuseq atugarissaarnerlu annertusarniarlugit aalajangersimasumik suliniuteqarnissaq.

Suliniummi ”Suliffeqarfiit peqqissut” suliffeqarfiit tapersersorneqarlutillu siunnersorneqartarput, tamatumalu saniatigut suliffeqarfinni peqqissuseq pillugu aallartitanut attaveqarfittut atuulluni. Suliniut suliffeqarfiit peqataasut kissaataat nalunaarutigisaallu tunngavigalugit ukiut tulliuttut pingasut ingerlanerini ingerlaavartumik ineriartortinneqassaaq.

Annertunerusumik paasisaqarusukkaanni saaffissat:

Peqqissutsimut Naalakkersuisoqarfik: Naalakkersuisup allattaa Nauja Møller, tlf.: +299 58 26 54.
CSR Greenland: Allattoqarfimmi pisortaq Lotte Frank Kirkegaard, tlf: +299 56 25 29
Kalaallit Nunaanni Timersoqatigiit Kattuffiat: Ineriartortitsinermut siunnersorti Aviaaja Geisler, tlf.: +299 34 81 50

Xsl file could not be processed